Zo zuuver als wat, Det is ZuuverZat

28 november optreden Ratingen

Wat waas det unne daag dae 28ste november aafgelaope jaor!

 

We waare met de kapel oetgenuüjt om ut 66 jäörig besjtaon van de vastelaovesvereiniging “die Rather aape” muzikaal ongerstebaove te haole.

Nao unne kier op bezuuk te zien gewaes onger de rouk van Düsseldorf, waas os belaof det ut ein fiës zol waere zoëas veur det nag noejts hadde belaef, nou det klopte.

 

Sjmorgus om un oer of tiën vertrok de bös oppe ruiver, om via Beesel nao Rathinge te reize.

Sjpesjaal veur dees gelaegeheid hadde we ozze hoëgheid (noe ex)Prins Ryan de iërste oetgenuujt om met os mei te reize om dao in pruüse de zaak oppe kop te gaon zette.

Vergezeld door zien eige adjudante en get leeje van de prinssecommisie sjting dae den aug netjes gereid oppe mèrt en zochte hae en zien compenie un plekske en un blikske inne bös, want der waare der al met dors!

 

Naodet we os gesjminck hadde in de bös en de sjefeur un uurke gaas had gegaeve ware we al op plaats van besjtumming.

As ich zegk det ze neet hadde geraekend op unne groep hollänger die waal un pilske luste den drök ich mich nag zaag oet. Toen we de zaal inleepe, ut make van muziek hadde we maar alvas oetgesjteld, dachte we iërs det we op de plaatselijke bejaarde zitting ware aangekomme.

Lekker Duits, alles zoot op zien gaat aan lang taofels te loestere nao get gewazel van unne kaerel daesse neet kos vesjtaon. Zelfs die pruüse zelf hadde der meujte mei, want die vraoge os konsjtantj om sjtil te zien.

Det waas al ein opgave op zich, toet euvermaot van ramp waas nao un rundje of 2-3  ut “gewuüne” beer op, reste os neet vuül angers den euver te sjtappe op ALT beer.

Iërs dachte we nag det we waal koste wenne aan det beer, maar persuünlik vonj ich toet op ut lèts neet te hakkele. Vonj ut nag ut meiste sjtaale op sjlappe sokkerpaek.

Der sjiene liefhebbers van te zien, maar die hadde veur noe net neet meigenaome!

Nao inkele muzikale intermetzo’s en ut oetwissele van get belaefthede en medalies woorte we nag getrakteert op un sjoëne maoltied, die aug waas aangepas aan de gebitskwaliteit van de euverige bezeukers.

Om maar met de wäörd van präëzes ex-leon 1 te sjpraeke: de metgereisde windjbuujels ware ein fantasties publiek!!! Van de euverige aanwezige bezuukers kreege we op ut lets neet mier zoëvuul bieval as det veur det normaal gewent zien…….

 

Hoëgste tied om op te sjtappe dus.

 

Toet euvermaot van ramp waas der in de omtrek van wao we os bevonje nurgus un kroeg te vinje die aope waas, wao we os ens lekker koste laote gaon.

Dus dankbaar gebroek gemaak van ut aopenbaar verveur richting ut centrum van Düsseldorf. Persuünlik wis ich neet desse in pruüses veur nieks met de trein mogs reize, maar ut kwaam os waal good oet.

Aangekomme in de binnesjtad gauw un kroeg opgezog wao we anger beer as ALT koste besjtelle, en dao ozze innerlijke dors geles!

Zelf heb ich gen idee wie laat we op hoës aan gegaon zien, maar aangekomme oppe ruiver waas der nag voldoende gelaegeheid om nag get nao te vertelle en beer te besjtelle veur diegene die nag neet genog gehad hadde, of nog unne get rare sjmaak in de mondj hadde van ut ierder genuumde plaatselik gerstenaat.

 

Al met al hebbe we os super vermaak dae daag, en zien we ein sjpesjaale ervaring rieker, of we nag ens gaon? Det weit ich neet, maar ich had ut aug neet wille misse.