Zo zuuver als wat, Det is ZuuverZat

Vastelaovend 2015……

Wat waas det sjiek, dit jaor weer aan de slaag te gaon, en same met al os ruiverse en offebekse miense vastelaovend te gaon viere.
Bienao al ein traditie, om met ut oetkomme van de ruiverse jeugdprins(ses) te starte en den langzaam same met de prins en de raod toe te laeve nao ut prinssebal en de komende vastelaovend.
Maar, hie geit hiel get aan veuraaf ken ich uch zègke. Os rippetities veur de vastelaovend sjtarte al in november, en ut samesjtelle van ut marsebeukske wuürd dökgenog in ein laat naojaorszùnke gedaon.
Eigelik zien veur als zuuverzat zon bietje ut jaor rondj bezig met de vastelaovend, en veur haope det dit auch dit jaor weer ein bietje oet de verf is gekomme.
Jonk als veur zien, hebbe we de luxe det veur nag idder jaor van os “foute” kenne en wille liere. Zoë zien we langzaam aan aant werke om os muziekkeuze mier Aaf te laote hange van ut moment, waal wille we vàs haaje aan de van os bekende muziekblokke, maar de invulling hievan versjild sjteeds mier. Auch ut sjpele in de kerk, idder jaor toch ein hiel sjpesjaal muzikaal moment, liek ( in os eige besjeije uig) idder jaor ein bietje baeter en zuuverder te gaon. Zuuver-zat is veur os neet genog op det moment, den moog ut allemaal ein tèndje baeter.

Wat we zeker neet wille verangere is os rippetoire met die daag. Det mot toch Waal veur 99% oet vastelaovesmuziek besjtaon. As prinssekapel make veur muziek wao ozze hoëgheid op nao binne ken zweeve, en det is vastelaovesmuziek.

Veur haope den auch dat hoëgheid prins Ryan 1 dit jaor ein aantal kier haet mooge zweeve.  Veur hebbe in idder geval genaote van ozze prins, en dök ut letste neutje droet motte perse, maar ut waas mier den de meujte waerd.
De recepties die we same met de windjbuujels hebbe bezog van al die angere hoëghede oet os windjbuujelriëk, ware sjtôk veur sjtôk diek de meujte, en we hebbe weer ein paar sjoën daag achter de rök. Auch ut bezeuk aan ut drakeriëk, en ut sjpele op de receptie in de sjakel ware weer fantastische momente, wao op ut lange rippetere weer miër den ens de meujte waerd bleek.

Maar, ut zit der weer op veur ein jaor, de sjlingers kenne weer efkès van de träöt, en de rippetities zalle weer veur ein paar maond ein angere inhoud hebbe. Efkès de kop op get angers, noe maar haope op eind sjoëne zomer.

Volgend jaor is uch prinssekepel weer van de partie, iërs weer lekker opwerme met hoëgheid Ryan1 en den verder met………

Veur de foto’s klik hie.